नाशिक लाईव्ह न्यूज । २ जुलै २०२५ । रेल्वेने प्रवास करणाऱ्या नाशिककरांसाठी एक महत्वाची बातमी आहे. नाशिक मार्गे धावणाऱ्या छत्रपती शिवाजी महाराज टर्मिनस (CSMT), मुंबई ते रिवा या साप्ताहिक विशेष गाडीला मुदतवाढ देण्यात आलीय. आता ही गाडी 25 सप्टेंबर 2025 पर्यंत धावणार आहे.
ही विशेष गाडी सीएसएमटीहून दादर, कल्याण आणि नाशिक रोडमार्गे रिवाला जाते. सुरुवातीला ही सेवा केवळ 4 जुलै 2025 पर्यंत मर्यादित होती. मात्र या गाडीला प्रवाशांकडून मिळणारा प्रतिसाद अत्यंत उत्साहवर्धक ठरला आहे. आजही ही ट्रेन पूर्ण क्षमतेने भरून धावत आहे. याच पार्श्वभूमीवर रेल्वे प्रशासनाने या विशेष गाडीच्या सेवेस मुदतवाढ देण्याचा महत्त्वपूर्ण निर्णय घेतला आहे.प्रवाशांचा मोठा प्रतिसाद पाहता आता या गाडीची सेवा 25 सप्टेंबर 2025 पर्यंत सुरू ठेवण्याचा निर्णय घेण्यात आला आहे.
त्याचप्रमाणे, सीएसएमटीहून रीवा दिशेने धावणारी साप्ताहिक विशेष गाडी (गाडी क्रमांक 02188) जी पूर्वी 4 जुलै 2025 पर्यंत मर्यादित होती, ती आता 26 सप्टेंबर 2025 पर्यंत सुरू राहणार आहे. प्रवाशांसाठी समाधानाची बाब म्हणजे या गाडीच्या कोच संरचनेत किंवा वेळापत्रकात कोणताही बदल करण्यात आलेला नाही. या गाडीचे थांबेही पूर्वीप्रमाणेच कायम ठेवण्यात आले आहेत.
या स्थानकांवर आहे थांबा?
रेल्वेने दिलेल्या माहितीनुसार, सीएसएमटी ते रीवा मार्गावर धावणारी ही गाडी दादर, कल्याण, नाशिक रोड, मनमाड, भुसावळ, खांडवा, हरदा, इटारसी जंक्शन, पिपरिया, गदरवाडा, नरसिंहपूर, जबलपूर, कटनी, मैहर आणि सतना या प्रमुख स्थानकांवर थांबा घेते.
